Seminar Objetivu Dezenvolvimentu Sustentavel (ODS) Objetivu 2 :Halakon Hamlaha
Text in english here.
Olá belun sira, Ekipa Kria Dalan iha Timor-Leste realiza tiha ona semináriu konaba Objetivu Dezenvolvimentu Sustentavel iha loron segunda ne’e 03 fulan Dezembru 2018 fatin iha Salaun Ministériu Soliedariedade Sosial no Inkluzivu. Membru hakerek nain nian Fabio Simões hakerek tiha ona rezumu konaba semináriu nian ne’ebe maka ita bo’ot sira bele le’e iha liña tuir mai.
Iha semináriu ida ne’e ami konvida tiha ona oradores nain tolu. Orador dahuluk nian mai husi Organizasaun World Food Program/Programa Aihan Mundial (WFP) ne’ebe koalia konaba dezafiu/obstákulu ba implementasaun Objetivu Dezenvolvimentu Sustentavel ne’ebe liga liu ba objetivu daruak nian: Zero Hunger. Orador daruak nian ne’ebe hetan aprezentasaun husi Diretor Sentru ba Dame nian iha UNTL, Professor Antero Benedito da Silva, señor Antero koalia konaba Nutrisaun no Hari’i paz, infelizmente orador datoluk nian labele marka prezensa.
Ami mós haksolok tebes atu anúnsia katak semináriu ida ne’e hetan partisipasaun ne’ebe ativu tebes husi Estudante Universitáriu sira, Grupu Voluntáriu sira iha Dili laran, hetan prezensa husi partisipante 65.
Partisipante sira iha semináriu. Oradores sira iha klaran – husi WFP nian maka Bluza kinor no kalsa mutin no señor Antero da Silva maka Kamiza azul no kalsa metan.
Iha semináriu ida ne’e World Food Program/Programa Aihan Mundial nian sira aprezenta konaba data peskiza nian katak, Timor-Leste oras ne’e sei afeta mal nutrisaun ne’ebe maka ho persentajem ne’ebe boot tebes, husi ida ne’e señor Antero mós iha ninia aprezentasaun hatete katak wainhira família ida hasoru Mal Nutrisaun no hamlaha ida ne’e signifika katak sira sei la moris iha paz nia laran, señor Antero mós hatete katak tamba ida ne’e ita presiza halo revolusaun ba dapur – ne’ebe signifika katak ita nu’udar sidadaun Timor nian presiza atu kontrola ita nia a’an husi buat ne’ebe maka ita atu han, atu nu’une ita sei bele iha hahan iha ita nia meza leten iha futuru mai, alem ida ne’e mós Nia hatete katak iha Timor-Leste ita seidauk iha seguransa no soberania ba aihan nian, tan ne’e maka wainhira ita koalia konaba Zero Hunger ita presiza halo definisaun klaru ba liafuan ne’e rasik tamba ida ne’e laos deit konaba ninia kuantidade maibe mós konaba ninia kualidade nian.
Hare’e mos fotografia eventu nian iha kraik.
Author: Fabio Simões and Eka Costa